22 маусым күні біздің мектеп жанындағы жазғы лагерьдің 4-маусымы «Армысың, жайдары жаз!» атауымен өз жұмысын бастады.

Аптаның негізгі мақсаты — балалардың демалысына қолайлы жағдай жасау, денсаулықтарын нығайту, шығармашылық қабілеттерін, қарым-қатынас дағдыларын және танымдық қызығушылықтарын әртүрлі ойын, танымдық және шығармашылық іс-шаралар арқылы дамыту.

Лагерьдің алғашқы күні салтанатты ашылу рәсімімен басталды. Балалар жазғы демалыстан кейін қуана қауышып, алдағы іс-шаралар жоспарымен танысып, лагерь жұмысына белсенді қатысты.

Достық пен көтеріңкі көңіл күй қалыптастыру мақсатында танысу ойындары, түрлі байқаулар мен көңілді эстафеталар ұйымдастырылды. Бұл балалардың бір-бірімен жақын танысып, ұйымшылдықтарын арттыруға көмектесті.

Күн барысында қауіпсіздік ережелеріне ерекше көңіл бөлінді. Тәрбиеленушілер мектеп аумағындағы қауіпсіздік талаптарын тыңдап, сауықтыру алаңындағы тәртіп ережелерімен танысты және серуен, ойындар мен көпшілік шаралар кезіндегі мінез-құлық нормаларын қайталады.

«Математикалық ойындар сағаты» аясында балалар қызықты математикалық тапсырмалар, логикалық ойындар мен сайыстарға қатысып, өздерінің тапқырлықтарын, зейіндерін және топпен жұмыс жасау қабілеттерін көрсетті.

Сонымен қатар «Сүйікті ертегі кейіпкерлері» атты танымдық-ойын бағдарламасы ұйымдастырылды. Балалар ертегі кейіпкерлерін еске түсіріп, викториналарға қатысып, жұмбақтар шешіп, сүйікті шығармаларымен бөлісті.

Лагерьдің алғашқы күні көңілді, қызықты әрі танымдық тұрғыда жоғары деңгейде өтті. Балалар көтеріңкі көңіл күй мен жағымды әсер алып, жаңа жазғы маусымды жарқын бастады!